دعوة الحق
دعوة الحق ماجينا عليها نحارب
ولاغصبنا احد يخرج معانا مسيره
علمتنا الحروب السابقه للتجارب
كل واحد حشد جيشه وناسي ضميره
صارت الحرب حرب الطائفه والمذاهب
كل واحد يشوف المشكله عند غيره
حرضو ساكني صنعا على اهل مارب
ونزلو اهل حجه بلحج الخضيره
واصبحو اهل عمران يركبو في قوارب
واهل صعده على مفرق حرض والحثيره
والذي من تعز اصبح لهادي جوارب
والذي من ذمار يطلع مع اهل المسيره
كلها حرب اشعلها مخطط وناهب
لخبطوها وشفنا الموت يشعل سعيره
راعي المال نسمع له ولو كان كاذب
حرمو الصدق لاصحاب الايادي الفقيره
وقت لعب البرع يلعب طويل الشوارب
صاحب القصر والصالون وابن الوزيره
ووقت قرع القنا والموت ماحد يحارب
غير ابن القبيلي اللي عيونه سهيره
تاجرو في دماء الشعب عند الاجانب
واعلنو انها هذا القضيه خطيره
كل واحد تلقى دعم واحنا نسارب
عندنا الدبة البترول نعمه كبيره
اصبح القلب متوجع وتفكير ظارب
شعبنا ضاق من كذب الحدث والجزيره
اي حين المواطن يصبح انسان تائب
يجعل الحكم للرحمن يعلم مصيره
دعوة الحق للمهدي وفيها العجايب
يكشف اسرار مايحدث وعنده بصيره
اتبع مايقول الله ولا تقول كاذب
قبل تحكم وعقلك حكمه واستشيره
كل انصار ناصر يعملو للتقارب
لاعلى طائفيه او تعصب لديره
ديننا راية الاسلام والحق غالب
لا ولن نعتدي واحنا الرجال الكثيره
ننطق بحق ونسمع للكلام المناسب
والعفو عندنا قربه تصفي السريره
لامذله ولانخضع لطاغي وغاصب
بالتواضع اسود الله ماهي حقيره
تحت رهن الاشاره تلتقينا كتايب
بايعين العمر لله مانستخيره
مانجاهد لاجل المغنمه والمناصب
ولانفجر كداعش بالجموع الغفيره
نرفض الحور والجنه وكل المكاسب
لجل ربي ورضوانه نجهز نفيره
#شرهابيات
